إحترم البكسل !!
كائن صغير ما يتعدى حجمه الملمترات كثير ما يستهان فيه مع أنه يعتبر المؤسس الرئيسي للصورة
فـ أي عبث يطري ع هالكائن راح تتغير الصوره سواء للسلبية أو الإيجابيةمن ضمن هالتغييرات تعديل دقة الصورة مع تغيير عدد أضلاع البكسل !!
كلنا نعرف أن الكاميرا لما صُنعت حدد لها حد أقصى للبكسلات الي تنتجها في الصورة .. فـ لما أزيد عدد البكسلات في الصورة سواء في الطول أو العرض راح يكون فيه خلل
مثال:ملعب يتسع لـ5000 مشجع..خلونا نعتبر مقاعد الملاعب هي البكسلات والملعب هو الصوره المقاعد الآن مرتبه بشكل منسق وبحيث يكون فيه ممرات ومساحات لمشي المشجعين تخيلوا حطينا بين كل مقعد ومقعد،مقعد بالغصب حتى لو ما ركب صح..وبالممرات حطينا مقاعد والدنيا صارت زحمة اهم شي يكون فيه مقاعد زياده عشان يدخل مشجعين أكثر..راح نفقد التنظيم والترتيب والشكل المنسق
فـ لما المصنع حدد لي حد أقصى للبكسلات في الصورة ليه ازيد عليها بكسلات أنا بغنى عنها وهي لا تسمن ولا تغني من جوع ؟! وهذا الخطأ اللي صاير عند البعض عند طباعة الصور .. تلقاه يعدل على الدقه بدون ما يحافظ على عدد البكسلات
يعني نقول الصورة من الكاميرا 3888 في 2592 بكسل بدقه 72 بكسل لكل بوصة يروح يعدل على الدقة يخليها 300 وما ينتبه للبكسلات اللي تغيرت لـ16200 في 10800 يعني بزياده 12312 في العرض و 8208 بكسل في الإرتفاع
خلونا نصغرها شوي .. مثلا صوره عدد البكسلات فيها 4 طول و 4 عرض .. زودت الدقه فيها بدون ما احافظ على عدد البكسلات وصارت 8 طول و 8 عرض
لو فكرت لـ لحظه..الفوتوشوب من وين جاب هالبكسلات .. هل هي حقيقية؟ أو أضيفت من نفس البرنامج؟
طبعاً أضافها البرنامج من عنده ..
سؤال ثاني ألوان هالبكسلات المختلقة من وين جابها الفوتوشوب وهي مو موجوده في الصوره من الأصل؟
طبعاً حسب قيمة ألوان البكسلات المحيطة في البكسل الجديد وأضاف اللون لها .. يعني ألوانها ما جت من الطبيعة اللي عكسها السنسور
فـ بكذا راح تتأثر الصوره سلبياً ، تقول لي كيف ؟؟ .. لاحظ معي
هذي صوره مكبره بعدد أضلاع البكسل الطبيعي للصورة
وهذي بعد زياده أضلاع البكسل طول وعرض
لاحظ المقصود في إضافة البكسلز وحساب ألوانها .. صارت المنطقة الفاصلة بين الألوان متدرجه بين الأصفر والأسود وصار فيه زي التمويه بالصوره
وبكذا فقدنا الدقه والحده .. وبالطباعه راح توضح لو دققت أكثر .. لو كان يضيف البكسلز ويضيف ألوانها على حسب اقرب بكسل له من جهه معينه ممكن ما نفقد الحده
بس بيكون فيه مشكله ثانيه اللي هي توزيع ألوان البكسلات .. يعني من مشكله لمشكله ثانيه !!
خلاصه الموضوع : لا نخلط بين الدقة في التصاميم والدقة في الصور
و يفضل تغيير دقة الصورة مع الحفاظ على عدد أضلاع البكسلات ، والسبب هو التوضيح اللي فوق ..
الطريقة :
بالنهايه .. أرجوا أن نقدم إحترامنا لهالكائن الصغير
يعطيك العافية عبدالله على هيك موضوع .
وفعلا مثل ما ذكرت أحيانا الصورة ولا اروع لكن تصير مشكلتها في الدقة .
:
:
سبحان من أوجد هالكائن ..
والله يالغالي لي تجارب .. غريبه .. مع هالكائن ..
سواءاً .. تصميم أو تصوير
ولو إني ما أعطيته كاامل حقّه بالإحترام .. إلا أنه قويّ بشخصيته .. يحب يفرض رأيه ..
:
:
تدوينة ممتازهـ جداً
استفدنا منها ..
محبك / وليد
شكراً جزيلاً
يعطيك العافية عزيزي عبدالله .. تدوينة جميلة ربما لم يهتم لمحتواها الكثير في السابق
شكراً جزيلاً لك ..
كنت بحآجه لمثل هذآ الشرح السلس
شكرآ جزيلآ
(f)
من الجيد أن يتمتع المصمم الذكي بحس اتقان العمل ومن اتقان العمل أن ينتهي العمل بصورة متناسقة غير مشوهة
ولكم الشكر